‘गोल्डमॅन’ रमेश वांजळेंची लेक पुण्यातील सर्वात श्रीमंत महिला उमेदवार, सायली वांजळेंची संपत्ती ७७ कोटी, सोनं किती?
भाजपच्या तिकिटावर प्रभाग क्रमांक ३२ वारजे-पॉप्युलर नगरमधून सायली वांजळे पुणे महापालिका निवडणूक लढवत आहेत
पुणे : पुणे महापालिका निवडणुकीच्या रिंगणात असलेल्या उमेदवारांच्या संपत्तीचे तपशील समोर आले आहेत. भाजप उमेदवार सुरेंद्र पठारे हे सर्वात श्रीमंत उमेदवार ठरले आहेत. त्यांची संपत्ती २७१.८५ कोटी रुपयांच्या घरात आहे. तर महाराष्ट्र नवनिर्माण सेनेचे दिवंगत नेते रमेश वांजळे यांची भाजपवासी कन्या सायली वांजळे यांची संपत्ती ७७ कोटी १२ लाख रुपये इतकी असून त्या सर्वात श्रीमंत महिला उमेदवार ठरल्या आहेत. मुख्य यादीत त्या दुसऱ्या क्रमांकावर आहेत.
(फोटो- महाराष्ट्र टाइम्स.कॉम)
सर्वात श्रीमंत उमेदवार कोण?
पुणे महापालिका निवडणुकीत उतरलेल्या उमेदवारांच्या संपत्तीचे तपशील समोर येत आहेत. सुरेंद्र पठारे यांनी निवडणूक आयोगाकडे दिलेल्या प्रतिज्ञापत्रानुसार त्यांची स्वतःची मालमत्ता २७१.८५ कोटी रुपये इतकी असल्याचं नमूद केलं आहे. त्यांनी निवडणुकीच्या तोंडावर भाजपप्रवेश केला होता.
सुरेंद्र पठारे यांची गुंतवणूक प्रामुख्याने रिअल इस्टेट क्षेत्रात आहे. त्यांच्याकडे मर्सिडिज बेंझ, बीएमडब्ल्यू आणि इनोव्हा क्रिस्टा यासारख्या आलिशान कार आहेत. याशिवाय त्यांच्या नावे १.७५ किलो सोन्याचे दागिने आहेत. संपत्तीचा विचार करता ते सर्वात श्रीमंत उमेदवार असल्याचे दिसते.
सायली वांजळे सर्वात श्रीमंत महिला उमेदवार
यादीत दुसऱ्या क्रमांकावर आणि महिला उमेदवारांमध्ये सर्वात श्रीमंत ठरल्या आहेत, सायली रमेश वांजळे. त्या भाजपच्या तिकिटावर प्रभाग क्रमांक ३२ वारजे-पॉप्युलर नगरमधून महापालिका लढवत आहेत. त्यांनी काही काळापूर्वीच भाजपचा झेंडा हाती धरला.
३१ वर्षीय सायली वांजळे या खडकवासला विधानसभा मतदारसंघाचे माजी आमदार आणि दिवंगत मनसे नेते रमेश वांजळे यांच्या कन्या आहेत. त्यांनी सादर केलेल्या प्रतिज्ञापत्रानुसार त्यांच्या नावावर एकूण ७७.१२ कोटी रुपयांची मालमत्ता आहे. वारसा हक्काने मिळालेल्या अनेक मालमत्तांचा उल्लेख आहे. २०१७ च्या निवडणुकीत सायली वांजळेंची संपत्ती ५० कोटींच्या घरात होती. आठ वर्षात त्यात ५० टक्क्यांहून अधिक वाढ दिसते.
सायली वांजळे यांच्या संपत्तीत रिअल इस्टेटमधील गुंतवणूक, बँक ठेवी यांचा समावेश आहे. मात्र त्यांनी आपला व्यवसाय म्हणून शेतीचा उल्लेख केला आहे. त्यांनी आबासाहेब गरवारे महाविद्यालयातून एमए शिक्षण पूर्ण केले आहे. पतीच्या नावावर ४० लाखांच्या मर्सिडीज बेंजची नोंद आहे. सायली यांच्या नावे १८ लाख ७५ हजार किमतीचे १५० ग्रॅम सोने आहे. सायलीचे वडील रमेश वांजळे यांची ‘गोल्डमॅन’ ही ओळख होती.
