कमाल आर खानला गंभीर प्रकरणात अटक, अभिनेत्यानं दिली गुन्ह्याची कबुली; नेमकं प्रकरण काय?
मुंबई – मुंबईतील दोन राउंड गोळीबार घटनेप्रकरणी शुक्रवारी रात्री उशिरा ओशिवरा पोलिसांनी अभिनेता आणि स्वयंघोषित चित्रपट समीक्षक कमाल रशीद खान उर्फ केआरकेला ताब्यात घेतलं आहे. तो या प्रकरणातील मुख्य संशयित आहे.
शुक्रवारी संध्याकाळी उशिरा केआरकेला ओशिवरा पोलिस ठाण्यात आणण्यात आलं. पोलिसांनी सांगितलं की, जबाबात केआरकेनं गोळीबार केल्याची कबुली दिली आणि त्यानं परवानाधारक बंदूक वापरली होती, परंतु कोणालाही इजा करण्याचा त्याचा हेतू नव्हता असंही सांगितलं. शनिवारी सकाळी पोलिसांनी केआरकेला अटक केली.
पोलिसांनी केआरकेची बंदूक जप्त केली
पोलिसांनी पुढे सांगितलं की, केआरकेची बंदूक जप्त करण्यात आली आहे आणि पुढील कारवाईसाठी कागदपत्रे तपासली जात आहेत. वृत्तानुसार, ही घटना १८ जानेवारी रोजी घडली, ज्यामध्ये अंधेरीच्या ओशिवरा येथील एका निवासी इमारतीवर दोन गोळ्या झाडण्यात आल्या. नालंदा सोसायटीमधून दोन गोळ्या जप्त करण्यात आल्या. एक फ्लॅट, लेखक-दिग्दर्शकाचा असून दुसरा मॉडेलचा फ्लॅट आहे.
मुंबईतील ओशिवरा परिसरात एका लेखक-दिग्दर्शक आणि एका मॉडेलच्या घरावर गोळीबार झाल्यानं खळबळ उडाली. सुदैवाने या घटनेत कोणीही जखमी झालं नाही. एबीपीच्या रिपोर्टनुसार, लेखक आणि दिग्दर्शक नीरज कुमार मिश्रा (४५) हे नालंदा सोसायटीच्या दुसऱ्या मजल्यावर राहतात, तर प्रतिक बैद (२९) हा मॉडेल आहे. गोळीबारानंतर दुसऱ्या आणि चौथ्या मजल्यावरील फ्लॅटमध्ये गोळ्यांचे निशाण आढळले.
पोलिस फॉरेन्सिक टीमच्या मदतीनं प्रकरणाचा तपास करत आहेत
घटनेची माहिती मिळताच, संजय चव्हाण यांच्या नेतृत्वाखालील ओशिवरा पोलिस स्टेशनच्या १८ पोलिस अधिकाऱ्यांच्या पथकानं या प्रकरणाचा तपास सुरू केला. सुरुवातीला सीसीटीव्ही फुटेज नसल्यानं पोलिसांना कोणताही सुगावा सापडला नाही. पण, फॉरेन्सिक टीमच्या मदतीनं पोलिसांच्या निदर्शनास आलं की, गोळ्या कमाल आर. खान यांच्या बंगल्यातून झाडल्या गेल्याची शक्यता आहे.
दरम्यान, कमाल अभिनेता, निर्माता, लेखक आहे. केआरके बिग बॉस सीझन ३ (२००९) मध्ये दिसला. नंतर त्यानं ‘एक व्हिलन’ (२०१४) मध्ये सहाय्यक भूमिका साकारली. अभिनेता अनेकदा त्याच्या वादग्रस्त वक्तव्यामुळे चर्चेत असतो.
