Delhi News Network : दिल्लीच्या मुख्यमंत्री म्हणून रेखा गुप्ता यांनी २० फेब्रुवारीला शपथ घेतली. भाजपाला दिल्लीच्या जनतेने बहुमत दिले. आता यादरम्यान सोशल मीडियावर एक दिशाभूल करणारा दावा केला जातोय. रेखा गुप्ता यांनी मुख्यमंत्रिपदाची शपथ घेतल्यानंतर 48 तासांमध्ये 50 लाखांची लग्झरी गाडी घेतल्याचा व्हिडीओ व्हायरल होतोय.
बूमला त्यांच्या फॅक्ट चेकमध्ये असे आढळून आले की, व्हिडिओमध्ये दिसणारी कार रेखा गुप्ता मुख्यमंत्री झाल्यानंतर घेतलेली नाही. रेखा गुप्ता मुख्यमंत्री होण्यापूर्वीच ही कार दिल्ली सरकारकडे होती, जी माजी मुख्यमंत्री अरविंद केजरीवाल आणि आतिशी मार्लेना यांनी देखील वापरलेली आहे. वायर एजन्सी IANS ने जारी केलेला व्हिडिओ शेअर करून व्हायरल दावा करण्यात आला आहे, ज्यामध्ये एक नवी कोरी एएमजी ग्लॉस्टर कार दिसत आहे.
हे एक्सवर शेअर करताना प्रेम कुमार नावाच्या एका व्हेरिफाईड यूजरने लिहिले की, ‘मुख्यमंत्री झाल्याच्या 48 तासांत 50 लाख रुपयांची कार. मुख्यमंत्री रेखा गुप्ता ‘शीशमहल’मध्ये जाणार नाहीत. रस्त्यावरच ‘शीश महाल’ बांधण्यात येणार आहे. नवीन सीएम आणि नवीन कारसाठी एकच वाक्य, गाण्याचे वाक्य ‘हां तुम बिल्कुल वैसी हो जैसा मैंने सोचा था.’
एक्सवरील आणखी एका वापरकर्त्याने व्हिडिओसह दावा केला की, रेखा गुप्ता यांनी येताच करदात्यांच्या पैशाची उधळपट्टी सुरू केली आहे.
फॅक्ट चेक
व्हायरल दाव्याची चौकशी करण्यासाठी, आम्ही प्रथम IANS ने प्रसिद्ध केलेला हा मूळ व्हिडिओ पाहिला. IANS ने 20 फेब्रुवारी 2025 रोजी सकाळी 10 च्या सुमारास शेअर केले होते. तोपर्यंत रेखा गुप्ता यांनी मुख्यमंत्रीपदाची शपथ घेतली नसल्याचे आम्हाला आढळून आले. आयएएनएसनुसार, दिल्लीच्या मुख्यमंत्र्यांचे सुरक्षा पथक अधिकृत कामकाजासाठी (शपथ ग्रहण) रेखा गुप्ता यांना घेऊन गेले होते. यामुळे आम्हाला संशय आला की व्हायरल दावा खोटा आहे.
व्हायरल व्हिडिओच्या कमेंट सेक्शनमध्ये अनेक युजर्सनी सांगितले की, ही कार माजी मुख्यमंत्री अरविंद केजरीवाल यांच्या काळात घेण्यात आली होती. आम्ही संबंधित कीवर्डद्वारे तपास केला तेव्हा आम्हाला अनेक जुने व्हिडिओ आढळले. दिल्लीचे माजी मुख्यमंत्री अरविंद केजरीवाल आणि आतिशी मार्लेना यांनी ही गाडी वापरली आहे.
सीएम रेखा गुप्ता यांच्या शपथविधीपूर्वी 20 फेब्रुवारी रोजी एनडीटीव्हीच्या व्हिडिओ रिपोर्टमध्ये यासंबंधीचा तपशील देण्यात आला होता. यामध्ये रिपोर्टर अश्विन कुमार सिंह रेखा गुप्ता यांच्या निवासस्थानाबाहेरून रिपोर्टिंग करत असताना ते स्पष्टपणे म्हणताना दिसत आहेत की, ही कार दिल्ली सरकारची आहे. 2022 मध्ये दिल्ली सरकारने आपल्या मंत्र्यांसाठी 1.44 कोटी रुपयांची काही वाहने खरेदी केली होती.
अरविंद केजरीवाल आणि आतिशी यांनी याचा वापर केला असून आता ही कार रेखा गुप्ता यांच्यासाठी आहे, असेही अहवालात सांगण्यात आले आहे. पुढे आम्ही व्हिडिओमध्ये दिसत असलेल्या ‘DL11CM0001’ या वाहन क्रमांकाची तपासणी केली. RTO VEHICLE INFORMATION च्या वेबसाईटवर आम्हाला वाहनाशी संबंधित माहिती मिळाली. त्यानुसार या MG GLOSTER वाहनाची नोंदणी 22 एप्रिल 2022 रोजी करण्यात आली. व्हायरल व्हिडीओ आणि जुन्या व्हिडीओमध्येही त्याच मॉडेलची कार दिसत असल्याचे आपण देखील पाहू शकता.
