“मी पुण्याचा डॉन आहे, जेलरला संपवलं, तुलाही संपवेन” — सणसवाडीत पोलिसाला मारहाण करत ११२ मशीन हिसकावले

पोलिसांची डायल 112 मशीन हिसकावली. “मी पुण्याचा डॉन आहे, जेलरला संपवलं, तुलाही संपवेन” अशा धमक्या देत पोलिसाला धक्काबुक्की व मारहाण. या प्रकरणी संबंधित चालकाविरुद्ध गुन्हा दाखल…..

पुणे जिल्ह्यातील शिक्रापूर पोलीस ठाण्याच्या हद्दीत सणसवाडी येथे दारूच्या नशेत वाहन चालवून अपघात घडवणाऱ्या आणि घटनास्थळी पोलिसांवर दादागिरी करत “मी पुण्याचा डॉन आहे, जेलरला संपवलं, तुलाही संपवेन” अशी धमकी देणाऱ्या व्यक्तीविरुद्ध गंभीर गुन्हा दाखल करण्यात आला आहे. विशेष म्हणजे या आरोपीने पोलीस कर्मचाऱ्याच्या हातातील डायल ११२ मशीन हिसकावून घेत त्यास धक्काबुक्की आणि मारहाणही केली.

ही घटना  पुणे अहिल्यानगर महामार्गावर सणसवाडी (ता. शिरुर) येथे घडली. एमएच १६ डीसी ०४७५ या इर्टिगा कारला एमएच १२ सीवाय  ५०२०या स्विफ्ट कारने पाठीमागून धडक दिली. अपघातानंतर वाद वाढल्यामुळे  डायल ११२ वर कॉल केला. शिक्रापूर पोलिसांचे पथक घटनास्थळी पोहोचले असता, त्यांनी चौकशी करत असताना स्विफ्ट कारचा चालक ऋषिकेश हरिषचंद्र गुंजाळ (वय २९, रा. पांडवनगर, पुणे) हा अत्यंत आक्रमक झाला.त्याच्या वर्तनावरून आणि तोंडातून येणाऱ्या दारूच्या उग्र वासावरून तो दारूच्या नशेत असल्याचा संशय पोलिसांना आला. त्याला शासकीय रुग्णालयात वैद्यकीय तपासणीसाठी नेण्यात आले असता, दारूच्या नशेत वाहन चालवण्याचे प्रमाणित झाले. दरम्यान, घटनास्थळी असताना त्याने पोलिसांच्या हातातील डायल 112 यंत्रणा हिसकावली, मोठ्याने ओरडत “मी बाउंसर आहे, मी पुण्याचा डॉन आहे, जेलरला संपवलं, तुलाही संपवेन” अशी धमकी दिली. पोलिसाला धक्काबुक्की करत रस्त्यावर ढकलून देत मारहाण केली.

घटनेनंतर पोलिसांनी तत्काळ कारवाई करत ऋषिकेश गुंजाळ याला ताब्यात घेतले. त्याच्याविरुद्ध शिक्रापूर पोलीस स्टेशनमध्ये दारूच्या नशेत वाहन चालवणे, सरकारी कामात अडथळा, शासकीय यंत्रणा हिसकावणे, मारहाण आणि धमकी देणे अशा गंभीर आरोपांखाली गुन्हा दाखल करण्यात आला असून सहाय्यक पोलीस उपनिरीक्षक वेरणनाथ मुत्तनवार हे पुढील तपास करत आहेत.