‘स्पा’ की ‘सिंडिकेट’? – पुण्यात सौंदर्यसेवेच्या आड सुरु असलेला गोरखधंदा, बंटी-बबलीपासून त्रिकुटापर्यंत ‘थेरपी’ची थरारक मालिका!

‘स्पा’ की ‘सिंडिकेट’? – पुण्यात सौंदर्यसेवेच्या आड सुरु असलेला गोरखधंदा, बंटी-बबलीपासून त्रिकुटापर्यंत ‘थेरपी’ची थरारक मालिका!

पुणे | प्रतिनिधी

कधी काळी शिक्षणाचे, संस्कृतीचे आणि आयटी हब म्हणून ओळखले जाणारे पुणे शहर आता ‘स्पा हब’ की ‘सेक्स हब’? असा प्रश्न नागरिक विचारू लागले आहेत. कारण – शहरभर पसरलेली स्पा चेन, सौंदर्य थेरपीच्या नावावर चालणारे अनैतिक व्यवहार, आणि त्यामागचं एक संगठित जाळं… ज्यात पोलिसांचंही ‘थोडं दुर्लक्ष’ आणि थोडं ‘समजून घ्या’ धोरण दिसतंय.

त्रिकुट मोकाट – आणि कायद्याची ‘थेरपी’

‘धनराज-प्रिया-अनुज’ या त्रिकुटाने पुण्यात तब्बल १०० हून अधिक स्पा सेंटरची साखळी उभी केली आहे. या तिघांनी मालकी टाळून व्यवस्थापकांच्या नावावर हे स्पा सुरू केले आणि स्वतः “फक्त बिझनेस अॅडव्हायझर” असल्यासारखे हात वर केले. परिणामी, पोलिसांनी छापे टाकले तरी गुन्हेगार कुणी? हे ठरवतानाच कायदा गोंधळतो.

गंमत म्हणजे, याच त्रिकुटाचे स्पा सेंटर कधीच बंद होत नाहीत, फक्त “रीब्रँडिंग” किंवा “नव्या व्यवस्थापनात” सुरू होतात. पोलिसांनी कारवाई केली तरी मूळ सूत्रधार नेहमी ‘बेड रेस्ट’वर असतात – थेट कायद्याच्या झोनबाहेर!

‘बंटी-बबली’ अजूनही फरार!

अनेक स्पा सेंटरमागे कार्यरत असलेली ‘बंटी-बबली’ जोडी – एक तरुण आणि एक महिला – ही शहरातील ‘स्पेशल सेवा’ पुरवणाऱ्या ठिकाणांची सूत्रधार असल्याचे समोर आले आहे. पोलिसांनी काही ठिकाणी छापे टाकले, महिलांची सुटका केली, पण ही जोडी अद्याप फरार आहे. हे स्पा नव्हे, तर एका संगठित मनोरंजन व्यवसायाचे फ्रँचायझी आहेत, असं आता शहरातील नागरिक म्हणू लागले आहेत.

स्पा की ‘स्पॉट’? — पुणेकरांचा उपरोध

 “थेरपीसाठी जाता आणि ऑफर येते ‘थरार’ची!”

“सावध व्हा – मसाजच्या नावाने मसाला मिळतो!”

“स्पा सेंटर म्हणजे आता फक्त बोर्ड, आत फक्त व्यवहार!”

सामान्य पुणेकर सोशल मीडियावरून ताशेरे ओढत आहेत. अनेक ठिकाणी महिलांवर अन्याय होत असून त्यांचा वापर केवळ ‘सेवा’साठी होतोय – हे विदारक वास्तव आहे.

पोलिसांकडून सांडलेली पकड?

अनेक छापे, काही अटक, पण त्रिकुट अजूनही सत्तेच्या बाहेर नाही. नागरिक विचारत आहेत – “हे नेमकं कोण चालवतंय?”

प्रशासनाचे काही हात यामध्ये मोकळे झालेत का?

एखाद-दोन कर्मचार्‍यांवर गुन्हा दाखल करून मोठे मासे सोडले जातात का?

 पुण्याचा ‘स्पा उद्योग’ – नाव सौंदर्यसेवेचं, काम मात्र काळवंडलेलं

धनराज-प्रिया-अनुज यांच्या त्रिकुटामुळे पुण्यात सौंदर्यसेवा ही आता शंका आणि संशयाच्या भोवऱ्यात सापडली आहे. बंटी-बबलींसारख्या चेहऱ्यांमागे लपलेली व्यवस्था, प्रशासनाचं मौन, आणि कायद्याचा बेमुदत उपचार – या सर्वांची साखळी तोडण्यासाठी ठोस कृती हवी.

नाहीतर पुढच्या पिढीला स्पा म्हणजे थेरपी नव्हे, तर थरार असंच शिकवावं लागेल!