40 मिनिटांचा प्रवास, शेवटच्या क्षणी काळाची झडप, पायलटही हतबल; अजित पवारांच्या विमान अपघाताची A to Z स्टोरी
पुणे (बारामती) : पुण्यातील बारामती विमानतळावर आज सकाळी घटलेल्या भीषण विमान अपघातात राज्याचे उपमुख्यमंत्री अजित पवार यांचा दुर्दैवी मृत्यू झाला आहे. हे विमान बारामती एमआयडीसीतील विमानतळावर उतरत असताना अचानक कोसळलं.
या भीषण अपघातात अजित पवार यांच्यासह विमानातील पाच जणांचा मृत्यू झाला आहे. जिल्हा परिषद निवडणुकीच्या प्रचारासाठी अजित पवार मुंबईहून बारामतीला निघाले होते. अजितदादांच्या अकाली निधनाने संपूर्ण राज्यात हळहळ व्यक्त होत असून सर्वजणच शोकसागरात बुडाले आहेत.
सुरक्षित लँडींग करण्याचा प्रयत्न, पण…
मिळालेल्या माहितीनुसार, अजित पवारांच्या विमानाने सकाळी 8 वाजून 10 मिनिटांनी मुंबईतून टेक ऑफ केलं होतं. हे विमान 40 मिनिटांत बारामती विमानतळाजवळ पोहोचलं. यावेळी लँडिंग करत असताना अखेरच्या क्षणी अनर्थ घडला. पायलटने सुरक्षित लँडींग करण्याचा प्रयत्न केला, पण त्यात त्यांना अपयश आलं. यानंतर हे विमान धावपट्टीवरून काही अंतर दूर जाऊन क्रॅश झालं.
प्रत्यक्षदर्शींनी काय सांगितलं?
अजित पवारांच्या विमानाचा अपघात झाला त्याठिकाणचे प्रत्यक्षदर्शीने धक्कादायक माहिती दिली आहे. पहिल्यांदा विमान वरुन गेलं, त्यानंतर गावातून खालून विमान येत होतं. नंतर विमान फिरलं आणि खाली जमीनीला लागलं, तेव्हा मोठा स्फोट झाला. स्फोट झाल्यानंतर आमच्या घरापर्यंत विमानाचे तुकडे उडाले. विमान जागेवर फिरलं आणि लगेच स्फोट झाला, असं एका महिला प्रत्यक्षदर्शीने सांगितलं.
विमान अपघातात कुणाकुणाचा मृत्यू
1. उपमुख्यमंत्री अजित पवार
2. मुंबई पीएसओ HC विदीप जाधव
3. पायलट कॅप्टन सुमित कपूर
4. कॅप्टन संभवी पाठक
5. पिंकी माळी, फ्लाईट अटेंडंट
मुंबई टेक ऑफ टाइमिंग सकाळी 08.10 मिनि
बारामती लँडिंग 08.50 मिनि
अजित पवारांची कारकीर्द कशी होती?
अजित पवार हे सहावेळा राज्याचे उपमुख्यमंत्री राहिले होते. जून 1991 साली ते सर्वप्रथम लोकसभेत निवडून गेले. त्यानंतर सप्टेंबर 1991 मध्ये विधानसभा निवडणूक लढवून ते आमदार झाले. तेव्हापासून ते विधानसभा सदस्य होते.
