रोहित पवारांचे एका मागोमाग एक भयंकर गौप्यस्फोट, ‘अजितदादांचा अपघात नाही तर…’
मुंबई: दिवंगत उपमुख्यमंत्री अजित पवार यांचे पुतणे, आमदार रोहित पवार यांनी त्यांच्या काकांच्या अपघाती मृत्यूबद्दल अनेक प्रश्न उपस्थित केले आहेत. त्यांनी अजित पवार यांच्या विमानाचा पायलट शेवटच्या क्षणी का बदलण्यात आला?
विमानाचे नेतृत्व कोणाला सोपवण्यात आले होते? त्यांचा ट्रॅक रेकॉर्ड तपासण्यात आला का? त्याची ब्रेथ एनालायजर चाचणी घेण्यात आली होती का? असं म्हणत रोहित पवारांनी तज्ज्ञ संस्थांकडून सखोल चौकशी करण्याची मागणीही केली. तसंच रोहित पवार यांनी पत्रकार परिषदेत हा विमान अपघात नसून तो घातपात असल्याचा संशय देखील थेट व्यक्त केला आहे.
अजित पवार कारने प्रवास करणार होते; त्यांचा प्लॅन कसा बदलला?
रोहित पवार यांनी स्पष्ट केले की, ‘अजित पवार बारामतीला विमानाने नव्हे तर कारने जात होते. 27 जानेवारी रोजी ते मुंबईहून निघणार होते. त्या संध्याकाळी त्यांचा गाड्यांचा ताफा तयार होता. मात्र, त्यावेळी पूर्व विदर्भातील एक प्रमुख नेते त्यांना भेटायला गेले. त्यांच्याशी त्यांची बराच वेळ चर्चा झाली. यामुळे अजित पवारांना बराच उशिरा झाला. त्यानंतर त्यांनी त्यांचा कार प्रवास रद्द केला आणि दुसऱ्या दिवशी सकाळी त्यांच्यासाठी विमान बुक करण्यात आले.’
‘ते’ नेते अजित पवारांकडे का आलेले?
रोहित पवार यांनी स्पष्ट केले की, अजित पवारांना भेटायला आलेल्या प्रमुख नेत्यांना त्यांच्य एका फाईलवर अजितदादांची सही हवी होती. फाईल मंत्रालयात होती. मुंबईत संध्याकाळी वाहतूक कोंडी बरीच असते. यामुळे फाईल येण्यास उशीर झाला. जर अजितदादांचे काम वेळेवर पूर्ण झाले असते, तर ते 27 जानेवारी रोजी संध्याकाळी कारने बारामतीला निघाले असते. जर तसे झाले असते तर माझे काका आज आमच्यासोबत असते.’
विमानाच्या कॅप्टनच्या रेकॉर्डबद्दल प्रश्न
रोहित पवार यांनी विमानाचे नेतृत्व करणारे कॅप्टन सुमित कपूर यांच्या रेकॉर्डबाबतही प्रश्नचिन्ह उपस्थित केले आणि दारूच्या व्यसनासाठी त्यांच्या तीन वर्षांच्या निलंबनाचा उल्लेख केला. त्यांनी सांगितले की, CID ला अपघाताची पूर्णपणे चौकशी करण्याचे अधिकार नाहीत. त्यांनी भारतीय एजन्सींव्यतिरिक्त राष्ट्रीय वाहतूक सुरक्षा मंडळ, नागरी विमान वाहतूक सुरक्षा अन्वेषण आणि विश्लेषण ब्युरो आणि यूकेची विमान अपघात अन्वेषण शाखा (AAIB) यासह अनेक विशेष एजन्सींकडून व्यापक चौकशीची मागणी केली.
विमान कंपनी प्रश्नाधीन
त्यांनी पुढे आरोप केला की, क्रॅश झालेल्या लेअरजेट विमानाची मालकी असलेली कंपनी व्हीएसआरचा डीजीसीए अधिकाऱ्यांवर प्रभाव आहे आणि ते काहीही करून पळवाट काढू शकतात. रोहित पवार म्हणाले की, 2023 मध्ये व्हीएसआर विमानाच्या अपघाताचा अंतिम तपास अहवाल अद्यापही सादर करण्यात आलेला नाही. असे असूनही, व्हीएसआर विमानांचा वापर अजूनही उच्चस्तरीय राजकारण्यांकडून केला जात आहे.
अपघातात कट रचल्याचा वास
कंपनीचा ऑपरेटिंग परवाना कधीही का रद्द केला गेला नाही असा प्रश्नही रोहित पवार यांनी यावेळी उपस्थित केला. रोहित पवार म्हणाले की, बुकिंग कंपनी, एरो, व्हीएसआर कंपनी आणि पायलट सुमित कपूर यांच्याबाबत गंभीर संशय आहे. त्यांनी आरोप केला की, “हा फक्त एक अपघात होता असे आम्हाला वाटत नाही. यामध्ये घातपात असल्याचा संशय आहे.” रोहित पवार यांनी अपघातापूर्वीच्या घटनांबद्दल अनेक प्रश्न उपस्थित केले. त्यांनी विचारले की शेवटच्या क्षणांपूर्वी विमानाचा ट्रान्सपॉन्डर जाणूनबुजून का बंद करण्यात आला होता?
रोहित पवार यांच्या मते, मूळ वैमानिक, साहिल मदान आणि यश यांना ट्रॅफिकमुळे उशीर झाल्याचे वृत्त आहे. त्यांनी विचारले, “मग सुमित कपूर आणि शांभवी पाठक विमानतळावर कसे पोहोचले? ते जवळपास राहत होते का?” त्यांनी असेही सांगितले की शांभवी पाठकला सुमित कपूरपेक्षा लियरजेट उडवण्याचा जास्त अनुभव होता. त्यांनी असा दावा केला की विमान एका बाजूला झुकले तेव्हाही सुमित कपूर शांत राहिले. तसंच कपूरने कठीण रनवे असलेल्या 11 ची वारंवार मागणी का केली होती आणि दृश्यमानतेची समस्या असूनही लँडिंगचा प्रयत्न का केला होता?
